პროდუქტები icon

სიახლეები

თებერვალი 14, 2014 ანალიტიკური ორგანიზაციების გაცვლითი პროგრამა

ანალიტიკური ორგანიზაციების გაცვლითი პროგრამა

ეკონომიკური პოლიტიკის კვლევის ცენტრის (EPRC) პროგრამების მენეჯერი ირინა გურული მონაწილეობას მიიღებს ანალიტიკური ორგანიზაციების გაცვლით პროგრამაში, რომელიც „ღია საზოგადოების ფონდების“ ანალიტიკური ორგანიზაციების ინსტიტუციონალური მხარდაჭერის პროგრამის ფინანსური მხარდაჭერით ხორციელდება. ინიციატივაში მონაწილეობის მისაღებად შეირჩა ათი წარმომადგენელი მსოფლიო ანალიტიკური ორგანიზაციებიდან. პროგრამის მიზანია გამოცდილების გაცვლის მხარდაჭერა სხვადასხვა ანალიტიკურ ორგანიზაციებს შორის მთელი მსოფლიოს მასშტაბით. ამასთანავე, ინიციატივის ფარგლებში მოხდება თანამშრომლობის, ერთობლივი კვლევითი პროექტების, ინსტიტუციონალური განვითარების წახალისება და მხარდაჭერა. გაცვლითი პროგრამა ორწლიანია და მოიცავს რამდენიმე პირისპირ შეხვედრას და დისტანციურ კონფერენციებს. ინიციატივის შედეგად განხორციელდება რამდენიმე ერთობლივი კვლევითი პროექტი.

EPRC-ის გარდა, მონაწილეებს შორის არიან შემდეგი ორგანიზაციის წარმომადგენლები: პოლიტიკის ანალიზის ბუდაპეშტის ინსტიტუტი – უნგრეთი, ზრდისა და თანასწორობის ხელშემწყობი სახელმწიფო პოლიტიკის გატარების ცენტრი – არგენტინა, პოლიტიკური და იურიდიული რეფორმების ცენტრი – უკრაინა, მუხლი 33 – ინდონეზია, Grupo FARO – ეკვადორი, პერუს კვლევითი ინსტიტუტი – პერუ, კვლევითი ინსტიტუტი – ინდონეზია, ევროპისა და ჩრილოატლანტიკურ საქმეთა ცენტრი – სლოვაკეთი, საერთაშორისო ურთიერთობათა ბრაზილიური ცენტრი – ბრაზილია.
ინიციატივის ფარგლებში პირველი შეხვედრა გაიმართება ქალაქ ლიმაში, პერუ, 2014 წლის 25-28 მარტს.