სიახლეები

საბედნიეროდ, აგვისტოს ომისგან განსხვავებით, უკრაინის წინააღმდეგ განხორციელებულმა დაუფარავმა სამხედრო აგრესიამ საერთაშორისო თანამეგობრობის ხისტი რეაქცია გამოიწვია. რუსეთის მიერ ოკუპირებულ საქართველოს მორალური მოვალეობაა სოლიდარობა და მხარდაჭერა გამოხატოს პუტინის რეჟიმის მორიგი მსხვერპლის მიმართ.

საერთაშორისო თანამეგობრობაში უკრაინაზე თავდასხმით გამოწვეული ერთსულოვნება საქართველოს აძლევს შესაძლებლობას მტკივნეული გამოცდილება ქვეყნის სასიკეთოდ გამოიყენოს. ამ ეტაპზე, ევროპული ინტეგრაციის დაჩქარებულ პროცესში სათანადოდ ჩართვა საქართველომ ვერ მოახერხა. არაფერი მიანიშნებს, რომ რუსეთი სამხედრო ექსპანსიის შეჩერებას აპირებს. ორაზროვანი და ბუნდოვანი პოლიტიკით საქართველო თავისუფალი სამყაროს იმ უმნიშვნელოვანესი თანადგომის დაკარგვის საფრთხეში იგდებს თავს, რომელიც აგრესორთან ბრძოლისთვისაა აუცილებელი.

თავისუფლებისთვის მიმდინარე ბრძოლის ხაზი საქართველოზეც გადის. 14 წლის შემდეგ, “ბორდერიზაცია“ და ოკუპაცია ჩვენი, ხშირად უგულებელყოფილი, ყოველდღიურობაა. ჩვენ ყველაფერი უნდა ვიღონოთ, რათა ოკუპაციისგან გათავისუფლებულმა საქართველომ შეუქცევადად დაიმკვიდროს ადგილი თავისუფალ სამყაროში.