English | Follow us
უპილოტო საჰაერო ხომალდების ექსპლუატაციის ახალი ნორმები
24 აგვისტო, 2017

ნინო ევგენიძე

ცოტა ხნის წინ, ალბათ, ბევრი ვერ წარმოიდგენდა, რომ უპილოტო საფრენი აპარატების რაოდენობა ქვეყანაში ისე მომრავლდებოდა, რომ მათი რეგულირება ავიაციის მარეგულირებელი სტრუქტურების მიერ გახდებოდა საჭირო. არადა, სიახლე გვამცნობს, რომ 2017 წლის 1 სექტემბრიდან უპილოტო საჰაერო ხომალდების ღია კატეგორიაში ექსპლუატაციისა და საჰაერო ხომალდის მოდელის ოპერირების მარეგულირებელი ნორმები ამოქმედდება. საქართველოს სამოქალაქო ავიაციის სააგენტოს ინფორმაციით, სამოქალაქო ავიაციის სააგენტოში უპილოტო საჰაერო ხომალდების რეგისტრაციის, ასევე სპეციფიკურ კატეგორიაში ფრენის მოთხოვნები ძალაში შევა 2017 წლის 1 ნოემბრიდან, ხოლო უპილოტო საჰაერო ხომალდების სერტიფიცირების ნაწილი 2020 წლის 1 იანვრიდან ამოქმედდება. საქართველოს სამოქალაქო ავიაციის სააგენტოს ინფორმაციით, რეგულირების წესის პროექტს დაემატა საჰაერო ხომალდის მოდელის ექსპლუატაციის მარეგულირებელი ნორმები. 
დაშვებული სიმაღლე – 400 ფუტი, გავრცელდება უპილოტო საჰაერო ხომალდების ექსპლუატაციაზე მხოლოდ ღია კატეგორიაში, შესაბამისად, უპილოტო საჰაერო ხომალდების 400 ფუტზე მაღლა ექსპლუატაცია დაშვებული იქნება მხოლოდ სააგენტოს თანხმობის საფუძველზე. რეგისტრაციისა და ექსპლუატაციაზე თანხმობის მიღებისთვის სერიული ნომრის წარდგენა სავალდებულო იქნება მხოლოდ ასეთის არსებობის შემთხვევაში. – მარეგულირებელი ნორმების ამოქმედებამდე, იმისათვის, რომ საქართველოს ტერიტორიაზე უპილოტო საჰაერო ხომალდების ოპერირებამ არ შეუქმნას საფრთხე ადამიანთა სიცოცხლეს, მათ პირად ცხოვრებასა და საკუთრებას, ასევე სამოქალაქო საჰაერო ხომალდების უსაფრთხოებას, სამოქალაქო ავიაციის სააგენტომ დრონის მფლობელებისთვის რამდენიმე რეკომენდაცია შეიმუშავა.
 – უპილოტო საჰაერო ხომალდის გამოყენებამდე დარწმუნდით, რომ მისი შემადგენელი ყველა მოწყობილობა მწყობრშია. უზრუნველყავით აპარატის გამართული მუშაობა მწარმოებლის მიერ მოწოდებული სახელმძღვანელო ინსტრუქციის შესაბამისად; დრონით ოპერირების წინ, გაეცანით ამინდის პროგნოზს. რთულ მეტეოროლოგიურ პირობებში ოპერირება საფრთხისშემცველია როგორც თქვენთვის და გარშემომყოფთათვის, ისე თქვენი აპარატისთვის; – მოერიდეთ უპილოტო საჰაერო ოპერირებას ქალაქებში, ქუჩებში, სკვერებში, საჰაერო სივრცის იმ მონაკვეთებში, სადაც დრონების ოპერირებაზე მოქმედებს წინასწარ დადგენილი შეზღუდვა მჭიდროდ დასახლებულ და ხალხმრავალ ადგილებში; – მოერიდეთ დრონის გამოყენებას შენობა-ნაგებობებისა და სტადიონების თავზე, სატრანსპორტო საშუალებების, მაღალი ძაბვის გადამცემი ბოძებისა და რადარების სიახლოვეს; – მოერიდეთ უპილოტო საჰაერო ხომალდების ოპერირებას საჰაერო ხომალდების, აეროპორტებისა და აეროდრომების სიახლოვეს.
 ჰორიზონტალური დისტანცია შეზღუდული დაშვების კონტროლირებად აეროდრომებთან უნდა შეადგენდეს, არანაკლებ, 6000 მეტრს; მუდმივად შეინარჩუნეთ ვიზუალური კონტაქტი უპილოტო საჰაერო ხომალდთან, ყოველგვარი დამატებითი დამხმარე საშუალებების გარეშე (ტელესკოპი, ბინოკლი, ხედვის გამაძლიერებელი ელექტრო-ოპტიკური საშუალებები), მოერიდეთ დრონის გამოყენებას ღამის საათებში. მოერიდეთ დრონების ოპერირებას 400 ფუტ სიმაღლეზე ზემოთ ხმელეთისა და წყლის ზედაპირიდან; – მოერიდეთ დრონების გამოყენებას მართლსაწინააღმდეგო მიზნებით. 
მოერიდეთ პირადი ცხოვრებისა და კერძო საკუთრების ამსახველ უკანონო აეროგადაღების წარმოებას უპილოტო საჰაერო ხომალდის მეშვეობით. გახსოვდეთ, რომ პირადი ცხოვრებისა და კერძო საკუთრების ხელშეუხებლობა გარანტირებული და დაცულია საქართველოს კანონმდებლობით. გახსოვდეთ, რომ უპილოტო საჰაერო ხომალდის უსაფრთხო ექსპლუატაციაზე პასუხისმგებლობა ეკისრება ხომალდის მფლობელს/ოპერატორს. შეგახსენებთ, რომ უპილოტო მფრინავი აპარატები საკმაოდ აქტიურად გამოიყენება კინო და ტელე, ასევე სარეკლამო ბიზნესში. მათმა ექსპლუატაციამ მნიშვნელოვნად შეამცირა ამ პროდუქტის წარმოების ხარჯები და ხელმისაწვდომი გახადა ყველა ბიუჯეტიანი შემოქმედებისთვის. დიდი ალბათობით, რეგულირების ეს წესები გარკვეულ ზეგავლენას ამ ბიზნესზეც მოახდენს.

     



< უკან
სიახლეები